साउदी , नेपालगञ्ज पोष्ट : साउदी अरबको मक्का शहरबाट मदिना जाँदै गरेको यात्रुबाहक बस दुर्घटना हुँदा ४२ भारतीय नागरिकको मृत्यु भएको छ। सोमबार राति भारतीय समयअनुसार करिब साढे १ बजे मुहरास क्षेत्रमा डीजेल ट्याङ्करसँग ठोक्किएपछि बसमा आगो लाग्दा ठूलो मानवीय क्षति भएको हो।

Advertisement 1

अन्तर्राष्ट्रिय सञ्चारमाध्यमका अनुसार मृतकमध्ये २० महिला र ११ बालबालिका छन्। सबैजना भारतको हैदराबाद क्षेत्रका भएकाले उनीहरू तीर्थयात्राका लागि मक्का–मदिना यात्रा गर्दै थिए। दुर्घटना हुँदा अधिकांश यात्रु सुतेका कारण उद्धार कठिन बनेको र आगलागीले क्षति बढेको अधिकारीहरूले बताए।

Advertisement 2

दुर्घटना स्थल मदिना शहरदेखि करिब १६० किलोमिटर टाढा पर्छ। ट्याङ्करसँग ठोक्किएसँगै बस पूरा रुपमा आगोमा जल्दा घटनास्थलमै धेरैको मृत्यु भएको प्रारम्भिक रिपोर्टमा उल्लेख गरिएको छ।

तेलंगाना सरकारले यस घटनाप्रति दुःख व्यक्त गर्दै रियादस्थित भारतीय दूतावाससँग निरन्तर समन्वय भइरहेको जनाएको छ। मुख्यमन्त्री रेवन्त रेड्डीले दिल्लीस्थित सम्बन्धित अधिकारीहरूलाई पीडितको पहिचान, कानुनी प्रक्रिया र आवश्यक सहयोगका लागि दूतावाससँग नजिकबाट काम गर्न निर्देशन दिएका छन्।