सन्देश भुसाल, नेपालगञ्ज : भेरी रकर्स स्पोर्टस क्लबको आयोजनामा नेपालगञ्जमा तेस्रो संस्करणको ‘राजा खान नेपालगञ्ज टी–१२ रात्रीकालीन क्रिकेट प्रतियोगिता’ भोलिदेखि सुरु हुँदैछ। नेपालगञ्ज उपमहानगरपालिका वडा नम्बर १८ स्थित विशालचोक मैदानमा आइतबार साँझ ८ बजेदेखि प्रतियोगिता भव्य रुपमा प्रारम्भ हुने तयारी गरिएको छ।

Advertisement 1

प्रतियोगिताको टाइटल स्पोन्सर समाजसेवी राजा खान रहेका छन्। विभिन्न सामाजिक कार्यमा सक्रिय रहेका खानको सहयोगका कारण प्रतियोगिताको नाममा समेत उनको नाम समावेश गरिएको क्लबका सचिव साहिल अन्सारीले जानकारी दिनुभयो

Advertisement 2

सचिव अन्सारीका अनुसार प्रतियोगितालाई सफल बनाउन नेपालगञ्ज उपमहानगरपालिका, एक्सपर्ट एजुकेसन, सगरमाथा इ. बोर्डिङ्ग सेकेन्डरी स्कुल, वडा नम्बर १, ८ र १८ का कार्यालयहरू, स्पोर्ट्स ग्यालेक्सी लगायतका निकायले सहयोग गरेका छन्।

Advertisement 3

कुल १४ लाख लागतमा सम्पन्न हुने प्रतियोगितामा बाँके जिल्लाका ४० वटा टिमहरूले सहभागिता जनाएका छन्। हालसम्म १० लाख रुपैयाँको व्यवस्था भइसकेको र बाँकी ४ लाखका लागि स्थानीय तह तथा संघसंस्थासँग समन्वय भइरहेको क्लबका अध्यक्ष मोहम्मद साजिद खानले जानकारी दिनुभयो।

यस पटकको प्रतियोगितामा विजेता टिमलाई १ लाख २५ हजार रुपैयाँ नगद पुरस्कार प्रदान गरिनेछ भने उपविजेतालाई ६० हजार रुपैयाँ दिइनेछ।

म्यान अफ द सिरिजलाई हिमालयन साइक्लसको तर्फबाट एउटा साइकिल उपहार दिइनेछ। त्यस्तै, नेपाल स्टील फर्निचर उद्योगको सहयोगमा उत्कृष्ट ब्याट्सम्यान र बलरलाई दराज उपहार दिइनेछ।

नेपालगञ्जमा खेल मैदानको अभाव भैरहेका बेला समाजसेवी विजय शर्माले विशालचोक मैदानमा जग्गा उपलब्ध गराएर प्रतियोगिता सफल बनाउन ठूलो भूमिका खेलेका छन्। साथै, समाजसेवी राजा खानले हिरमिनिया स्थित आफ्नो ३५ कट्ठा जग्गा भविष्यमा क्रिकेट खेलाडीहरूका लागि उपलब्ध गराउने घोषणा गरेका छन्।

निष्कर्षमा, युवाहरुको प्रतिभा उजागर गर्ने उद्देश्यले आयोजना गरिएको ‘राजा खान नेपालगञ्ज टी–१२’ प्रतियोगिता नेपालगञ्जको खेल क्षेत्रको विकासमा कोसेढुङ्गा सावित हुने अपेक्षा गरिएको छ।