नेपालगञ्ज पोष्ट। लुम्बिनी प्रदेशसभा सदस्य सरिता पुन मगरको शनिबार काठमाडौंमा उपचारकै क्रममा निधन भएको छ।

Advertisement 1

रुकुम पूर्वकी पुन एमालेको समानुपातिकतर्फ प्रदेशसभा सदस्य बनेकी थिइन्। केही दिनअघि स्वास्थ्य समस्या देखिएपछि उनलाई काठमाडौंस्थित शिक्षण अस्पताल महाराजगञ्ज अन्तर्गतको मनमोहन सेन्टरमा भर्ना गरिएको थियो।

Advertisement 2

उपचारका क्रममा पुनमाथि दुईवटा ठूलो शल्यक्रिया गरिएको थियो। पहिलो अपरेशनमार्फत उनले छोरीलाई जन्म दिएकी थिइन् भने दोस्रो अपरेशनमा मुटुमा कृत्रिम भल्भ प्रत्यारोपण गरिएको थियो। तर, स्वास्थ्यमा सुधार नआएपछि उनको निधन भएको अस्पतालले जनाएको छ।

Advertisement 3

पुन लुम्बिनी प्रदेशसभामा अर्थ तथा पर्यटन विकास समितिकी सदस्य थिइन्। उनकाे निधनले एमाले पार्टी तथा लुम्बिनी प्रदेशसभामा शोकको वातावरण छाएको छ।

रुकुम पूर्वको तकसेरा निवासी पुनको असामयिक निधनप्रति प्रदेशसभा सदस्य, राजनीतिकर्मी तथा स्थानीयवासीले दुःख व्यक्त गरेका छन्।