नयाँ दिल्ली: भारतको महाराष्ट्र राज्यको जलगाउँमा बुधबार राति भएको दुःखद रेल दुर्घटनामा (यो समाचार तयार पार्दासम्म) १३ जनाको मृत्यु भएको छ, जसमा चार नेपाली नागरिक पनि छन्। लखनऊबाट मुम्बई जाँदै गरेको पुष्पक एक्सप्रेस रेलमा आगो लागेको अफवाहका कारण भागदौड मच्चिँदा यात्रुहरू अर्को ट्र्याकमा पुगेका थिए। त्यही क्रममा विपरीत दिशाबाट आएको कर्नाटक एक्सप्रेस रेलले ठक्कर दिँदा यो दुर्घटना भएको हो।

Advertisement 1

दुर्घटनामा ज्यान गुमाउने नेपाली नागरिकहरूमा ११ वर्षीय नन्दराम विश्वकर्मा, २३ वर्षीय लछिराम पासी, ४३ वर्षीया कमला भण्डारी, र इम्तियाज अली रहेका छन्। अन्य मृतकमा चार भारतीय नागरिक छन्, तर उनीहरूको पहिचान खुल्न सकेको छैन।

Advertisement 2

भारतीय रेलवे अधिकारीहरूका अनुसार, आगलागीको अफवाह फैलिएपछि एक यात्रुले आपतकालीन चेन तानेर रेल रोकेका थिए। त्यसपछि केही यात्रुहरू डरले रेलबाट ओर्लिएर अर्को ट्र्याकतर्फ भागे। तर, दुर्भाग्यवश, त्यही समय विपरीत दिशाबाट अर्को रेल गुज्रिँदा दुर्घटना भयो।

Advertisement 3

घटनामा ४० जना घाइते भएका छन्, जसमध्ये केहीको अवस्था गम्भीर छ। घाइतेहरूको उपचार स्थानीय पाचोरा ग्रामीण अस्पतालमा भइरहेको छ। घटनास्थलमा एम्बुलेन्स र आपतकालीन टोलीहरू परिचालन गरिएका थिए। उद्धारकार्यका लागि ग्लास कटर र फ्लडलाइटजस्ता उपकरण प्रयोग गरिएको थियो।

भारतको रेलवे विश्वकै चौथो ठूलो रेल नेटवर्क हो, तर पछिल्लो समयमा हुने ठूला दुर्घटनाहरूले यसको छवि धमिलिएको छ। २०२३ मा मात्रै एक रेल दुर्घटनामा २८८ जनाको मृत्यु भएको थियो। प्रधानमन्त्री नरेन्द्र मोदी नेतृत्वको सरकारले रेलवेको आधुनिकीकरणका लागि ३० अर्ब डलरको योजना अघि बढाएको छ।