नेपालगञ्ज पोष्ट, झापा – आन्दोलनबाट फर्किरहेका शिक्षकहरू चढेको रात्रिबस दुर्घटना हुँदा १६ जना घाइते भएका छन्। घाइतेमध्ये एक जनाको अवस्था गम्भीर रहेको बताइएको छ।
काठमाडौँबाट झापा जाँदै गरेको उक्त रात्रिबस आज बिहान करिब साढे ५ बजे शिवसताक्षी नगरपालिका–९ को दूधे भन्ने स्थानमा दुर्घटनामा परेको हो। पूर्व–पश्चिम राजमार्गअन्तर्गत पर्ने उक्त खण्डमा बस अनियन्त्रित भई दुर्घटनामा परेको प्रहरीले जानकारी दिएको छ।
प्रहरीका अनुसार बसका चालक महेन्द्र कन्दङ्वालाई नियन्त्रणमा लिइएको छ। दुर्घटनामा घाइते भएका शिक्षकहरूलाई विर्तामोडस्थित बिर्तासिटी अस्पताल र बिएन्डसी अस्पतालमा उपचार भइरहेको छ।
बसमा सवार सबै जना आन्दोलनमा सहभागी भएर फर्किंदै गरेका शिक्षक रहेको प्रारम्भिक जानकारी आएको छ।
