बाँके : बाँकेको डुडुवा गाउँपालिका वडा नम्बर २ को कोल्ही गाउँमा सोमबार बिहान गहुँको खेतमा भएको भीषण आगलागीबाट लाखौं रुपैयाँ बराबरको गहुँबाली जलेर नष्ट भएको छ।

Advertisement 1

स्थानीय समय अनुसार बिहान करिब ११ बजेतिर खेतमा अचानक आगलागी सुरु भएको थियो। आगलागी फैलनासाथ स्थानीय किसानहरू तत्काल नियन्त्रणमा जुटे पनि ६ जना किसानको खेतमा भित्र्याउन तयार गहुँ जलेर खरानी भएको छ।

Advertisement 2

पिडित किसान बृजमोहन भुजुवाका अनुसार, आगलागी सुरु हुँदा उनीहरू खेतमा पुगेका थिए, तर त्यतिबेलासम्म गहुँ खरानी भइसकेको थियो। “हामी त्यहाँ पुग्दा खेतमा लागेको गहुँ खरानी भइसकेको थियो,” उहाँले भन्नुभयो, “आफुसँगै आधा दर्जन किसानको गहुँ जलेको छ, धेरै पीडा भयो।”

प्रहरीको प्रारम्भिक अनुसन्धान अनुसार कसैले बिडी खाएर फालेको ठुटोबाट आगलागी भएको अनुमान गरिएको छ। स्थानीयवासी र बाटो निर्माणमा प्रयोग भइरहेको पानी ट्यांकरको सहायतामा करिब पौन घण्टामा आगो नियन्त्रणमा लिइएको थियो।

प्रहरीका अनुसार, आगलागीबाट करिब २ बिगाहा क्षेत्रफलमा फैलिएको गहुँबाली जलेर चार लाख रुपैयाँभन्दा बढीको क्षति भएको अनुमान गरिएको छ।

यस घटनाले डुडुवाका किसानहरूलाई ठूलो आर्थिक क्षति पुर्‍याएको छ र आगामी दिनमा सावधानी अपनाउनुपर्ने देखिएको छ।