कैलाली : धनगढी उपमहानगरपालिका–९ स्थित सालघारी सामुदायिक जंगलमा दुई युवाको शव फेला परेको छ।
मृत्यु हुनेमा धनगढी उपमहानगरपालिका–१० का अन्दाजी ३० वर्षीय देवल चौधरी र ३२ वर्षीय कैदा राना रहेको जिल्ला प्रहरी कार्यालय कैलालीले जनाएको छ।
प्रहरीका अनुसार चौधरीको शव साइकलमा सामान बाँध्ने ट्युबको डोरीले पासो लागेको अवस्थामा झुण्डिएको थियो भने करिब १५ मिटर टाढा रानाको शव भुइँमा फेला परेको थियो।
घटनाको जानकारी पाएपछि जिल्ला प्रहरी कार्यालय कैलालीका डीएसपी तथा प्रवक्ता कविन्द्र सिंह बोहोराको नेतृत्वमा प्रहरी टोली घटनास्थल पुगेको थियो। प्रहरीले मुचुल्का तयार गरी शव उठाएर पोस्टमार्टमका लागि पठाउने तयारी गरेको छ।
घटनाको थप अनुसन्धान भइरहेको प्रहरीले जनाएको छ।
