सन्देश भुसाल,नेपालगञ्ज : इस्लाम धर्मावलम्बीहरूको पवित्र महिना रमजान आज देखि सुरु हुँदैछ। एक महिनासम्म चल्ने यस अवधिमा मुसलमानहरू सूर्योदयदेखि सूर्यास्तसम्म निराहार ब्रत (रोजा) बस्ने गर्दछन्।

Advertisement 1

हिजरी संवतअनुसार रमजान इस्लाम धर्मको नवौँ महिना हो। धार्मिक मान्यताअनुसार यही महिनामा मुसलमानहरूको प्रमुख धर्मग्रन्थ कुरान अवतरण भएको विश्वास गरिन्छ। यस अवसरमा इस्लाम धर्मावलम्बीहरू अल्लाहको कृपा प्राप्त हुने आशा राख्छन्।

Advertisement 2

रोजा सूर्योदयअघि बिहानको नमाज (फजिर) अघि केही खानेकुरा खाएर सुरु गरिन्छ, जसलाई सेहरी भनिन्छ। त्यसपछि पूरै दिन पानी समेत नपिई निराहार ब्रत बस्ने चलन छ। बेलुकी मगरिबको नमाजपछि आजान सुनेर खजुर अथवा पानीबाट रोजा खोल्ने (इफ्तार) गरिन्छ।

Advertisement 3

रोजा बस्ने समय सूर्य उदय-अस्तसँगै दैनिक परिवर्तन हुने गर्छ। इस्लाम धर्ममा रोजा बस्नु धार्मिक कर्तव्य मानिन्छ। तर, नाबालक, बिरामी, गम्भीर रोगी र गर्भवती महिलाहरूलाई रोजा बस्न अनिवार्य गरिएको छैन।

रमजान महिनामा गरिब, दिनदुःखी र असहायहरूलाई दान दिने परम्परा छ। मुसलमानहरूले आफ्नो कमाइको निश्चित अंश जकात रूपमा दान गर्छन्। यो महिना आत्मसंयम, त्याग, तपस्या र बलिदानको महिना मानिन्छ।

रमजान महिनाको सुरु हुने दिन मुसलमान समुदायले चन्द्रमा देखेपछि घोषणा गरिन्छ। शरीरलाई पवित्र राखेर रोजा बस्नुपर्ने धार्मिक मान्यता रहेको छ। रमजान महिना मुसलमानहरूका लागि ठूलो आस्था, भक्ति र अनुशासनको पर्व हो। एक महिनाको रमजान सम्पन्नपछि इस्लाम धमार्वलम्बीको मुख्य पर्व इद उल फित्र मनाउने गर्दछ ।