सन्देश भुसाल : नेपालगञ्जमा पछिल्लो समय जमुनाह नाकासँग जोडिएको एक घटनाले व्यापक चर्चा र आलोचना निम्त्याएको छ। नेपालगन्ज उद्योग वाणिज्य संघ का केही पदाधिकारीहरूले नाकामा गएर नागरिकमाथि अनावश्यक हस्तक्षेप गरेको भन्दै विभिन्न तहबाट प्रश्न उठ्न थालेका छन्।

Advertisement 1

स्थानीयहरूका अनुसार संघका अध्यक्ष टंक धामीसहितको टोली नाकामा पुगेर सुरक्षाकर्मीको शैलीमा नागरिकका झोला जाँच गर्ने जस्ता गतिविधिमा संलग्न भएको देखिएको छ। यस्तो कार्यले अधिकार क्षेत्र नाघेको मात्र होइन, सर्वसाधारणमाथि अनावश्यक दबाब सिर्जना गरेको भन्दै आलोचना भइरहेको छ।

Advertisement 2

यता, बजारभित्र भने अवस्था फरक रहेको गुनासो व्यापारी तथा उपभोक्ताबाट आइरहेको छ। कालोबजारी, मूल्यवृद्धि र बिना बिलका सामान खुलेआम कारोबार भइरहेको अवस्थामा त्यसतर्फ संघ मौन देखिएको आरोप छ। ठूला व्यापारीका गोदाममा क्यारिङ्गका सामान थुप्रिएको र अनियमितता बढ्दो अवस्थामा रहेको बताइन्छ।

Advertisement 3

सरकारले सय रुपैयाँभन्दा माथिका सामानमा भन्सार कडाइ गरेपछि नाकामा निगरानी बढेको हो। तर, यही बहानामा संघका पदाधिकारीहरूले उपभोक्तामाथि नै कडाइ देखाएको भन्दै आलोचना चर्किएको छ। नाकामा कडाइ गर्दा शहरभित्र भइरहेको लुट र मूल्यवृद्धिप्रति भने ध्यान नदिइएको गुनासो बढ्दो छ।

सामाजिक सञ्जालमा आलोचना बढ्दै जाँदा संघको कार्यशैलीमाथि प्रश्न उठ्न थालेको छ। उपभोक्ताको पक्षमा आवाज उठाउँदा बेवास्ता गर्ने, तर आफ्ना पक्षमा मात्र प्रतिक्रिया जनाउने प्रवृत्तिले संस्थागत जिम्मेवारीप्रति सचेतनाको कमी देखिएको टिप्पणी पनि भइरहेको छ।

यस घटनाले एउटा स्पष्ट सन्देश दिएको छ—नियमन र अनुगमन गर्ने जिम्मेवारी राज्यका निकायको हो, निजी संस्थाले त्यसको सीमाभित्र रहेर मात्र भूमिका निर्वाह गर्नुपर्छ। अन्यथा, यस्तो गतिविधिले संस्थाप्रतिको विश्वास घटाउने मात्र होइन, नागरिक अधिकारमाथि समेत प्रश्न खडा गर्छ।