नेपालगञ्ज : सुदूरपश्चिमको मौलिक संस्कार र सभ्यतासँग सम्बन्धित ‘ढोग दिया’ शब्दको दुरुपयोगप्रति देउडा संस्कृति संरक्षण प्रतिष्ठानले कडा आपत्ति जनाउँदै तुरुन्त रोक लगाउन माग गरेको छ। प्रतिष्ठानका अध्यक्ष ध्रुव बहादुर सिंहद्वारा जारी गरिएको प्रेस विज्ञप्तिमा काली-कर्णाली क्षेत्रका मौलिक परम्परा, संस्कृति र सभ्यतालाई अपहेलित गर्ने कार्यप्रति गम्भीर आपत्ति व्यक्त गरिएको छ।

Advertisement 1

सुदूरपश्चिम प्रदेशमा मान्यजनप्रति सम्मान प्रकट गर्दै खुट्टामा दण्डवत् प्रणाम गरी आशीर्वाद लिने कार्यलाई ‘ढोग दिने’ भनिन्छ। यो कार्य क्षेत्रीय पहिचान र सभ्यतासँग जोडिएको अत्यन्तै महत्त्वपूर्ण पक्ष हो। तर, हालै सम्पन्न नेपाल प्रिमियर लिग (एनपीएल) क्रिकेट प्रतियोगितामा ‘ढोग दिया’ शब्दलाई असान्दर्भिक र मनोरञ्जनका लागि दुरुपयोग गरिएको प्रतिष्ठानको दाबी छ।

Advertisement 2

विज्ञप्तिमा भनिएको छ, “हाम्रो परम्परा, मौलिकता, सत्यता र संस्कारसँग जोडिएका ओजपूर्ण शब्दहरूलाई खिल्ली उडाउने र अपहेलना गर्ने कार्यले सुदूरपश्चिमको सांस्कृतिक पहिचानमा आघात पुर्याएको छ। यस्ता कार्य तत्काल रोक्न सम्बन्धित पक्षले कदम चाल्न आवश्यक छ।”

Advertisement 3

प्रकाशित विज्ञप्तिमा ‘ढोग दिया’ जस्ता शब्दको दुरुपयोगले क्षेत्रीय संस्कृतिमा पर्न सक्ने नकारात्मक प्रभावबारे सचेत गराइएको छ। यस प्रकारको अपमानजनक व्यवहारले समाजमा भ्रम र असन्तुष्टि फैलाउने खतरा रहेको उल्लेख गर्दै प्रतिष्ठानले यसबारे सामाजिक सञ्जाल तथा विभिन्न माध्यमबाट व्यापक ध्यानाकर्षण गराएको छ।

देउडा संस्कृति संरक्षण प्रतिष्ठानले सुदूरपश्चिमका मौलिक परम्परा र सभ्यता जोगाउन सबैलाई जिम्मेवारीपूर्वक व्यवहार गर्न आग्रह गरेको छ।