काठमाडौं : विसं २०७२ को विनाशकारी भूकम्पपछि पुनःनिर्माण सम्पन्न ऐतिहासिक धरहराबाट पहिलो सातामै रु १४ लाख ७० हजार राजस्व स‌ङ्कलन भएको छ। यही म‌ङ्सिर ९ गतेदेखि सर्वसाधारणका लागि शुल्कसहित खुला गरिएको धरहराबाट मङ्सिर १६ गतेसम्म उल्लेख्य संख्यामा नागरिकको उपस्थिति रह्यो।

Advertisement 1

दैनिक १,२०० भन्दा बढी अवलोकनकर्ता

Advertisement 2

कामु आयोजना निर्देशक प्रकाश अर्यालका अनुसार, हरेक दिन करिब १,२०० जनाले धरहरा चढ्ने गरेका छन्। ९ गतेदेखि १६ गतेसम्म ८,३१६ जनाले धरहरा चढिसकेका छन्। बालबालिकाको तथ्याङ्क नराखिएको भए पनि दैनिक अवलोकनकर्ताको संख्या उल्लेख्य रहेको छ। धरहरा बिहान १०:३० देखि दिउँसो ३ बजेसम्म मात्र खुला रहेकाले समय अभावका कारण सबैलाई टिकट उपलब्ध गराउन नसकिएको उनले बताए।

Advertisement 3

शुल्क संरचना

धरहरा चढ्न प्रतिव्यक्ति रु २०० तोकिएको छ भने विद्यार्थी, ज्येष्ठ नागरिक, बालबालिका, र अपाङ्गता भएका व्यक्तिहरूका लागि ५० प्रतिशत छुटको व्यवस्था गरिएको छ। सार्क राष्ट्रका पर्यटकका लागि रु ५०० र अन्य राष्ट्रका लागि रु १,००० शुल्क निर्धारण गरिएको छ। धरहरा परिसरमा प्रवेशका लागि रु ५०, पार्किड शुल्क दुई पाङ्ग्रेका लागि रु १०२ चार पाङ्ग्रेका लागि रु २० प्रतिघण्टा तोकिएको छ।

भाडा दरहरू

धरहरा स्तम्भमा राष्ट्रिय महत्वका विज्ञापन गर्न प्रतिघण्टा रु ५,०००, व्यावसायिक भिडियो छायाङ्कनका लागि रु ५,००० र फोटोग्राफीका लागि रु १,००० शुल्क निर्धारण गरिएको छ।

समय थपको सम्भावना

बिहानदेखि साँझसम्म धरहरा खुला गर्ने व्यवस्था मिलाएमा दैनिक १,५०० जनासम्मले अवलोकन गर्ने अनुमान गरिएको छ। विशिष्ट संरचना सञ्चालन तथा व्यवस्थापन विकास समिति आदेश, २०८१ बमोजिम धरहराको सञ्चालन व्यवस्था गरिएको हो। म‌ङ्सिर ६ गते बसेको मन्त्रिपरिषद् बैठकले धरहरा खुला गर्ने र शुल्क स्वीकृत गर्ने निर्णय गरेको थियो।

नागरिकको उत्साहजनक उपस्थिति

संक्षिप्त समयावधिमा पनि नागरिकको उल्लेख्य उपस्थिति देखिएको र यसले राष्ट्रिय सम्पदाप्रतिको आकर्षण झल्काएको निर्देशक अर्यालले बताए।