नेपालगन्ज : नयाँ नेपाली चलचित्र “मुक्तिपुर” को छायाङ्कन औपचारिक रूपमा सुरु भएको छ। बसुन्धरा स्थित इन्द्रेणी मन्दिरमा शुभ–मुहूर्त गर्दै फिल्मको सुटिङ अघि बढाइएको हो।

Advertisement 1

सुनिल पाण्डेको निर्देशनमा बन्न लागेको यो चलचित्र साइबा फिल्म प्रोडक्सनको ब्यानरमा तयार हुँदैछ भने एभरेस्ट फिल्म एकेडेमीको सहकार्य रहेको छ। चलचित्रमा विजय राजवंशी र रोशन पासवान निर्माता रहेका छन्। विशाल श्रेष्ठ कार्यकारी निर्माता तथा केशव गौतम सह–निर्माताको रूपमा रहेका छन्। सञ्चय गुरुङ र सुरज चौधरी लाइन प्रोड्युसर रहेका छन् भने द्वन्द निर्देशन सौगात बस्नेतले सम्हालेका छन्। छायाङ्कन सरोज महत्त्वले गरिरहेका छन्।

Advertisement 2

प्राइम रिभेन्ज जनरामा निर्माण हुन लागेको “मुक्तिपुर” ले बदलाको कथालाई केन्द्रमा राख्नेछ। एक परिवारको प्रतिनिधित्व गर्ने पात्रको जीवनमा घट्ने महत्वपूर्ण घटनाहरू, त्यसबाट उत्पन्न परिस्थितिहरू र त्यसपछिको संघर्ष तथा सफलताको कथा फिल्ममा प्रस्तुत गरिने निर्देशक पाण्डेले जानकारी दिएका छन्।

Advertisement 3

फिल्ममा नाजिर हुसेन, गौरव पहाडी, एभोन राज उप्रेती, प्रकाश शाह र आकारिती बुढाथोकी लगायत कलाकारहरूको अभिनय रहनेछ।

हाल फिल्मको छायाङ्कन टोली नेपालगञ्ज पुगेको छ र त्यहाँका विभिन्न स्थानहरूमा सुटिङ भइरहेको छ। नेपालगञ्ज आसपास यसअघि पनि कोहलपुर एक्सप्रेस, ग्याङ्स्टर ब्लुज, सिल्ली, राजा रानी, कानुन, कहाँ छौ कहाँ, माइतीघर र ढुवानी जस्ता चलचित्रहरूको छायाङ्कन भइसकेको छ।

स्थानीय स्तरमा निरन्तर रूपमा फिल्म छायाङ्कन हुनुले नेपालगञ्ज क्षेत्रलाई चलचित्र निर्माणका लागि आकर्षक गन्तव्यको रूपमा चिनाउन सहयोग पुगेको छ।