सूचीकरण नभएसम्म फेसबुक-युट्युबसहित २६ सामाजिक सञ्जाल निष्क्रिय हुने (सूचीसहित)

काठमाडौं । सरकारले नेपालमा दर्ता (सूचीकरण) नभएसम्म फेसबुक, युट्युबलगायत २६ वटा सामाजिक सञ्जाललाई निष्क्रिय राख्ने निर्णय गरेको छ । सञ्चार तथा सूचना प्रविधि मन्त्रालयले बिहीबार नेपाल दूरसञ्चार प्राधिकरणलाई पत्र पठाउँदै सूचीकरणमा नआएकालाई बन्द गर्न निर्देशन दिएको हो ।

मन्त्रालयका प्रवक्ता गजेन्द्रकुमार ठाकुरका अनुसार सूचीकरण भएकालाई खुला राख्ने र प्रक्रियामा नआएकालाई तत्काल निष्क्रिय गर्ने निर्णय गरिएको छ । “पाँच वटा सूचीकरण भइसकेका छन्, बाँकीलाई निष्क्रिय गरिनेछ । तर, दर्ता हुन आएकै दिन ती सामाजिक सञ्जाल पुनःसक्रिय गरिनेछ,” उनले बताए ।

हालसम्म भाइबर, टिकटक, विटक, निम्बस र पोपोलाइभ सूचीकरण भइसकेका छन् । टेलिग्राम र ग्लोबल डायरी भने सूचीकरण प्रक्रियामा छन् । तर, फेसबुक, युट्युब, ट्विटर (एक्स), इन्स्टाग्रामलगायत लोकप्रिय सामाजिक सञ्जाल भने अझै दर्ता प्रक्रियामा आएका छैनन् ।