कैलाली । २८ वर्षदेखि बन्द अवस्थामा रहेको कैलालीको टीकापुर विमानस्थल आइतबारबाट पुनः सञ्चालनमा आएको छ। तारा एयरको ट्विनअटर विमानले १२ यात्रु र चालक दलका तीनसहित छ कर्मचारी बोकेर पहिलो नियमित उडान सम्पन्न गरेको हो। २०४१ साल असोज २५ गतेदेखि सञ्चालनमा आएको यो विमानस्थल सशस्त्र द्वन्द्वका कारण २०५३ साल माघदेखि बन्द भएको थियो। अब पुनः सञ्चालनमा आएपछि टीकापुर नगरपालिका आसपासका कैलाली, बर्दिया र सुर्खेतका बासिन्दालाई हवाई यात्रामा सहज हुने विश्वास गरिएको छ। नियमित उडान तालिका नागरिक उड्डयन प्राधिकरणले तारा एयरलाई हप्तामा दुई दिन आइतबार र बिहीबार काठमाडौँ–नेपालगञ्ज–टीकापुर रुटमा नियमित उडान अनुमति दिएको छ। काठमाडौँबाट: बिहान १०:०० बजे यति एयरलाइन्सको विमान नेपालगञ्ज उडान भर्नेछ। नेपालगञ्ज–टीकापुर: दिउँसो १२:३० बजे तारा एयरले नेपालगञ्जबाट टीकापुरका लागि प्रस्थान गर्नेछ। टीकापुर–नेपालगञ्ज: दिउँसो १:२० बजे टीकापुरबाट नेपालगञ्जका लागि फर्किनेछ। नेपालगञ्ज–काठमाडौँ: दिउँसो २:०५ बजे यति एयरलाइन्सको विमान काठमाडौँका लागि उडान भर्नेछ। नेपालगञ्जबाट टीकापुरसम्मको उडानमा १८ मिनेट र फर्कंदा २० मिनेट समय लाग्ने बताइएको छ। उडानका क्रममा विमानले आउनेतर्फ ६५ सय फिट र फर्कंदा ५५ सय फिटको उचाइ लिनेछ। स्थानियलाई सुविधा विमानस्थल सञ्चालनपछि धनगढी र नेपालगञ्ज धाउनुपर्ने समस्या समाधान हुनेछ। कैलाली, सुर्खेत र बर्दियाका यात्रुहरूलाई सहज र छिटो हवाई सेवा उपलब्ध हुने अपेक्षा गरिएको छ। टीकापुर विमानस्थलको धावनमार्ग हाल कच्ची (ग्राभेल) भएकाले नागरिक उड्डयन प्राधिकरणले हिउँदको मौसममा मात्रै उडान अनुमति दिएको छ। नेपालगञ्ज–टीकापुरको एकतर्फी भाडा ३,६०० रुपैयाँ तोकिएको छ। परीक्षण र सहकार्य यसअघि कात्तिक १२ गते नेपाल वायुसेवा निगम र तारा एयरले टीकापुरमा परीक्षण उडान गरेका थिए। यसैगरी, अछामको साँफेबगर विमानस्थलमा नियमित उडान सुरू गर्न तारा एयर र साँफेबगर नगरपालिकाबीच सहमति भइसकेको छ। परीक्षण उडान सफल भएपछि त्यहाँ पनि हवाई सेवा सञ्चालन हुनेछ। विकासको प्रतीक टीकापुर विमानस्थल सञ्चालनले कैलाली र आसपासका जिल्लामा यातायात सुविधा वृद्धि गर्नेछ। लामो समयदेखि हवाई सेवा पर्खिरहेका स्थानीयका लागि यो महत्वपूर्ण उपलब्धि मानिएको छ। Post navigation पश्चिम नवलपरासीमा गोलीकाण्ड: तीन अभियुक्त पक्राउ, घरेलु पेस्तोलको प्रयोग सामुहिक बलत्कार गरेको आरोपमा ८ जना पक्राऊ
