नेपाली सेनामा पहिलो पटक सिख समुदायको प्रतिनिधित्व, बाँकेको करनसिंह सिखको ऐतिहासिक उपलब्धि

सन्देश भुसाल, नेपालगञ्ज: बाँके जानकी गाउँपालिका–२, बनकटवाका करनसिंह सिख नेपाली सेनामा भर्ती भई इतिहास रचेका छन्। उनी नेपाली सेनामा सेवा दिने सिख समुदायका पहिलो व्यक्ति बनेका हुन्।

अछाम जिल्लास्थित गोरख बक्स गण, मंगलसेन ब्यारेकमा सम्पन्न दसौँ समूहको सैन्य आधार तालिममा सहभागी करनसिंहले ‘सैन्य आधार तालिमको अन्तिम दलेल कवाज’ सफलतापूर्वक पूरा गरेसँगै नेपाली सेनामा सिख समुदायको सहभागिता सुनिश्चित भएको हो।

करनसिंहको यो सहभागिता नेपाली सेनामा विविधता र समावेशीताको दृष्टिकोणबाट ऐतिहासिक कदमका रूपमा लिइएको छ। यससँगै सिख समुदायको नेपाली राष्ट्रिय सेवामा प्रत्यक्ष सहभागिता प्रारम्भ भएको छ।

स्थानीयवासी र उनका आफन्तले करनसिंहको यस उपलब्धिमा गर्व व्यक्त गर्दै भविष्यमा अन्य सिख युवालाई पनि देशसेवामा प्रेरणा मिल्ने विश्वास व्यक्त गरेका छन्।