एसपी घर्तीको प्रतिबद्धता: “जनमैत्री प्रहरी, पारदर्शी सेवा”

बाँके, सोमबार – हालै बाँके जिल्लाको प्रहरी प्रमुखको रूपमा नियुक्त भएका प्रहरी वरिष्ठ उपरीक्षक (एसपी) राम प्रसाद घर्तीले सोमबार एक पत्रकार भेटघाट तथा अन्तरक्रिया कार्यक्रममा आफ्नो कार्यदिशा सार्वजनिक गरेका छन्।

जिल्ला प्रहरी कार्यालय बाँकेमा आयोजित कार्यक्रममा एसपी घर्तीले कानूनको शासन बलियो बनाउने, लागुऔषध नियन्त्रण गर्ने तथा आपराधिक गतिविधिमाथि कडा निगरानी राख्ने प्रतिबद्धता व्यक्त गरे। साथै, प्रहरी सेवामा पारदर्शिता, जनमैत्रीता र सञ्चारकर्मीहरूसँग सहकार्यलाई प्राथमिकतामा राख्ने स्पष्ट संकेत दिए।

“म खुला ढोका नीतिमा विश्वास गर्छु। सञ्चारकर्मीहरू हाम्रो ऐना हुन्। तपाईंहरूको सुझाव, प्रश्न र आलोचना हाम्रो सुधारको आधार हो,” घर्तीले बताए।

कार्यक्रममा नेपाल पत्रकार महासंघ बाँके शाखाका पदाधिकारीहरू, विभिन्न सञ्चारमाध्यमका सम्पादक, पत्रकार तथा वरिष्ठ प्रहरी अधिकृतहरूको उपस्थिति थियो। सहभागीहरूले प्रेस र प्रहरीबीचको सहकार्य अझ बलियो बनाउनु पर्नेमा जोड दिएका थिए।

सौहार्दपूर्ण वातावरणमा सम्पन्न उक्त कार्यक्रममा एसपी घर्तीको स्पष्ट कार्ययोजना र संवादमुखी शैलीले बाँके जिल्लामा जनसुरक्षा र सुशासनप्रति नयाँ आशा जागृत गराएको सहभागीहरूको धारणा थियो।