नेपालगन्ज पोष्ट : बाँकेको नेपालगञ्ज मा ‘नेपालगञ्ज स्ट्रीट फुड एण्ड बेभरेज फेस्टिभल’ आयोजना हुने भएको छ। होटल व्यवसायी संघ बाँके र होटल संघ नेपाल (HAN) बाँकेको संयुक्त आयोजनामा आगामी २०८३ साल वैशाख ११ देखि १३ गतेसम्म फेस्टिभल सञ्चालन गरिने जानकारी मंगलबार आयोजित पत्रकार सम्मेलनमार्फत दिइएको हो।

Advertisement 1

फेस्टिभल सुशिल कोइराला स्मृति गेट देखि पश्चिमतर्फ वाटरपार्क क्षेत्रसम्म आयोजना हुनेछ। तीन दिनसम्म चल्ने यस महोत्सवले स्थानीय खानाका परिकार, कला–संस्कृति र पर्यटन प्रवर्द्धनलाई प्राथमिकता दिने आयोजकको भनाइ छ।

Advertisement 2

पत्रकार सम्मेलनमा होटल संघ नेपाल (HAN) बाँकेका अध्यक्ष दिवाकर खनालले फेस्टिभलमार्फत स्थानीय परिकारको पहिचान, संस्कृति संरक्षण र पर्यटन प्रवर्द्धन गर्ने उद्देश्य रहेको बताए। उनले गुणस्तरीय सेवा र उपभोक्ताको हितलाई ध्यानमा राख्दै कार्यक्रम सञ्चालन गरिने उल्लेख गरे।

Advertisement 3

त्यसैगरी होटल व्यवसायी संघ बाँकेका अध्यक्ष भिमलाल कँडेलले फेस्टिभलमा स्थानीय स्ट्रीट फुडदेखि परम्परागत तथा आधुनिक खानाका विविध स्टलहरू रहने जानकारी दिए। साथै लाइभ म्युजिक, सांस्कृतिक प्रस्तुति र मनोरञ्जनात्मक कार्यक्रमहरू पनि समावेश गरिने उनले बताए।

उनका अनुसार फेस्टिभलले छिमेकी भारत बाट आउने पर्यटकलाई आकर्षित गर्ने, स्थानीय व्यवसायलाई प्रोत्साहन गर्ने र नेपालगञ्जलाई ‘फुड डेस्टिनेशन’का रूपमा स्थापित गर्न महत्वपूर्ण भूमिका खेल्ने अपेक्षा गरिएको छ।

आयोजकका अनुसार महोत्सव सफल बनाउन २ सय ५१ सदस्यीय मूल समिति र १७ वटा उपसमिति गठन गरिएको छ। फेस्टिभलले स्थानीय आर्थिक गतिविधि वृद्धि, रोजगारी सिर्जना तथा उपभोक्तालाई गुणस्तरीय सेवा प्रदान गर्न सहयोग पुग्ने विश्वास व्यक्त गरिएको छ।